पत्रकार भोजराज थापा रास्वपाबाट चुनाव लड्ने तयारीमा
काठमाडौं । चर्चित पत्रकार भोजराज थापा राष्ट्रिय स्वतन्त्र पार्टी (रास्वपा)का तर्फबाट चुनाव लड्ने तयारीमा लागेका छन्। पत्रकारितासँगै समाजसेवामा सक्रिय रहेका थापा निर्वाचनमा दाङ क्षेत्र नं. १ बाट चुनाव लड्ने जर्मको गरिरहेका छन् ।
थापा र रास्वपाका शीर्ष तथा स्थानीय तहका नेताहरूबीच पछिल्ला दिनमा निरन्तर संवाद चलिरहेको बताइएको छ,भने पछिल्लो समय नक्खु कारागारमा रहेका रास्वपा सभापति रवि लामिछानेसँग पनि संवाद गरेका खुलेको छ ।
स्रोतहरूको दाबी अनुसार, ‘संवाद अत्यन्तै सकारात्मक’ रहेकाले थापा अब पार्टीको औपचारिक निर्णयको प्रतीक्षामा छन्। उनी चुनावी तयारी, स्थानीय राजनीतिक समीकरण र भोटर बेसको विश्लेषणमा जुटिसकेको बताइएको छ। पार्टीले अन्तिम कागजी प्रक्रिया पूरा गरेपछि उनी सार्वजनिक रूपमा चुनावी मैदानमा उत्रिने अनुमान गरिएको छ।
यस क्षेत्रबाट गत निर्वाचनमा हालको नेपाली कम्युनिस्ट पार्टी र त्यतिबेलाको नेकपा एकीकृत समाजवादीका नेता मेटमणि चौधरी विजयी भएका थिए। चौधरीले त्यतिबेला नेकपा एमालेकी नेतृ शान्ता चौधरीलाई पराजित गर्दै निर्वाचन जितेका थिए।
दाङ १ लाई वामपन्थी पकड रहेको क्षेत्रको रुपमा लिइन्छ। यस्तो अवस्थामा रास्वपाले सफल पत्रकारिताको पृष्ठभूमिबाट आएको, सार्वजनिक छवि बलियो रहेको व्यक्तिलाई अघि सार्ने तयारी गरेको छ ।
रास्वपाभित्र अन्तिम छलफल केही दिनमै टुंगिने अपेक्षा गरिँदैछ। सहमति बनेपछि थापा दाङ–१ बाट उम्मेदवार घोषणा हुन सक्ने अनुमान छ।
