आगामी आर्थिक वर्षमा बजेटमा ५.६% वृद्धि, आन्तरिक ऋणमा निर्भरता झनै बढ्यो
काठमाडौं । सरकारले आगामी आर्थिक वर्ष २०८२/८३ का लागि सार्वजनिक गरेको बजेटमा ५.६ प्रतिशतको वृद्धि देखिएको छ। कुल १९ खर्ब ६४ अर्ब ११ करोड रुपैयाँको बजेट ठूलो हिस्सा पुनः चालु खर्चमा विनियोजन गरिएको छ ।
अर्थमन्त्री विष्णु पौडेलले संघीय संसद्को संयुक्त सदनमा प्रस्तुत गरेको बजेट अनुसार, कुल बजेटमध्ये ११ खर्ब ८० अर्ब चालु खर्चमा, ४ खर्ब ७ अर्ब पुँजीगत खर्चमा र ३ खर्ब ७५ अर्ब वित्तीय व्यवस्थापनमा छुट्याइएको छ।
तर स्रोत व्यवस्थापनको हिसाबले हेर्दा, सरकार पुनः आन्तरिक ऋण र वैदेशिक ऋणमा निर्भर देखिएको छ। १३ खर्ब १५ अर्ब रुपैयाँ राजस्वबाट उठाउने योजना भए पनि बाँकी रकम २ खर्ब ३३ अर्ब वैदेशिक ऋण र ३ खर्ब ६२ अर्ब आन्तरिक ऋणमार्फत जुटाइनेछ।
विकास पूर्वाधार, रोजगारी सिर्जना, र उत्पादनमूलक क्षेत्रलाई सम्बोधन गर्ने पुँजीगत खर्च केवल ४ खर्ब ७ अर्बमा सीमित छ, जुन समग्र बजेटको करिब २१ प्रतिशत मात्रै हो।
बजेटले वैदेशिक अनुदानको हिस्सा घटाएर केवल ५३ अर्ब ४५ करोडमा सीमित गरेको छ, जुन विगत वर्षहरुभन्दा कम हो।
