नेपाल मोबाइल व्यवसायी महासंघको चौंथो केन्द्रीय साधारणसभा वैशाख २६ र २७ गते हेटौंडामा हुँदै
हेटौंडा। नेपाल मोबाइल व्यवसायी महासंघको चौंथो केन्द्रीय साधारणसभा हेटौंडामा यहि वैशाख २६ र २७ गते आयोजना हुने भएको छ। महासंघले मंगलबार प्रेस विज्ञप्ति जारी गर्दै कार्यक्रमको सम्पूर्ण तयारी अन्तिम चरणमा पुगेको जानकारी गराएको छ।
मोबाइल एसोसिएसन अफ मकवानपुरलाई स्थानीय संयोजकको जिम्मेवारी दिइएको र भेलामा देशभरका ६० जिल्ला, सात प्रदेश र महासंघ केन्द्रीय नेतृत्व गरी करिब एक हजार मोबाइल व्यवसायी सहभागी हुने अनुमान आयोजकको छ।
साधारणसभा मोबाइल व्यवसायमा देखिएका कानुनी समस्या, समाधानका उपाय, अवसर र चुनौतीका विषयमा केन्द्रित हुने जनाइएको छ। त्यस्तै, मोबाइल बिक्रीमा देखिएको अस्वाभाविक प्रतिस्पर्धा र त्यसले व्यवसायमा पारेको असरलाई कसरी समाधान गर्न सकिन्छ भन्ने विषयमा पनि खुला र बन्द सत्रमार्फत छलफल गरिनेछ।
कार्यक्रम हेटौंडा-४, मेनरोडस्थित रोयल पार्टी प्यालेसमा हुनेछ। बागमती प्रदेशका मुख्यमन्त्री बहादुरसिंह लामाले साधारणसभाको उद्घाटन गर्नेछन्। साथै, कार्यक्रम स्थल बाहिर मोबाइल र एसोसरिजका १० वटा स्टल रहनेछन्, जहाँ सहभागी कम्पनीहरूले आफ्ना उत्पादनबारे जानकारी दिनेछन्।
साधारणसभालाई राभोज मोबाइल र साओ मि मोबाइलले मुख्य प्रायोजन गर्ने छन् भने बीएन ट्रेडर्स, अल्टिमा, माइ पावर, आरती चार्जर उद्योग र नोइजले सहप्रायोजन गर्ने छन्। कार्यक्रमको उद्घाटन यहि वैशाख २७ गते विहान ७ बजे प्रभातफेरिको आयोजना गरी गरिनेछ।
कार्यक्रममा महासंघले करिब २० लाख रुपैयाँ खर्च हुने अनुमान गरेको केन्द्रीय उपाध्यक्ष तथा साधारणसभा संयोजक छतेन्द्र आचार्यले जानकारी दिएका छन्।
