मेची–महाकाली राष्ट्रिय उद्धार यात्राअन्तर्गत कोशी प्रदेशमा ४४ जनाको उद्धार
हेटौंडा । कोशी प्रदेशमा मेची–महाकाली राष्ट्रिय उद्धार यात्राअन्तर्गत ४४ जनाको उद्धार गरिएको छ। ‘यो पटकको चाडपर्वमा कसैले बस्न नपरोस् सडकपेटीमा’ भन्ने नाराका साथ मानव सेवा आश्रम र आनी छोइङ डोल्मा फाउण्डेसनले संयुक्त रूपमा आयोजना गरेको यस उद्धार यात्रामा ३५ पुरुष र नौ महिला गरी कुल ४४ जनालाई उद्धार गरिएको हो।
आश्रमका अध्यक्ष रामजी अधिकारीका अनुसार, उद्धार यात्राको क्रममा बिहीबार उदयपुरका विभिन्न स्थानबाट १६ जनाको उद्धार गरिएको छ। उद्धार गरिएका आठ पुरुष र आठ महिलालाई बिहीबार नै मानव सेवा आश्रमको विराटनगर शाखामा लगिएको छ।
उद्धार यात्रा असोज २८ गतेदेखि सुरु भएको थियो । यसमा गायिका आनी छोइङ डोल्मा र मानव सेवा आश्रमका अध्यक्ष अधिकारीसहित ४७ जना सहभागी छन्। यो उद्धार यात्रा कात्तिक २६ गते सम्पन्न हुने योजना रहेको छ।
