देशभर अविरल वर्षाका कारण ठूलो विपत्ति ३० जनाको मृत्यु, ११ जना बेपत्ता
हेटौंडा । अविरल वर्षाका कारण सिर्जित बाढी र पहिरोको घटनामा काठमाडौँ उपत्यकासहित देशका विभिन्न भागमा ३० जनाको मृत्यु भएको छ भने ११ जना बेपत्ता भएका छन्। सशस्त्र प्रहरी बल नेपालले विपद् प्रतिकार्यका लागि १,९४७ सुरक्षाकर्मी परिचालन गरेको छ ।
सशस्त्र प्रहरीका सहप्रवक्ता शैलेन्द्र थापाका अनुसार उपत्यकामा २१ जनाको र उपत्यका बाहिर नौ जनाको मृत्यु भएको पुष्टि भएको छ । यसबाहेक, एक सय ६२ स्थानमा भौतिक क्षति भएको छ ।
सशस्त्र प्रहरीले बाढी र डुबानमा परेका नागरिकहरूको उद्धारका लागि २३ वटा ¥याफ्टिङ बोट परिचालन गरिरहेको छ । यसै क्रममा, ७६० जनाको सकुशल उद्धार गरिएको जानकारी प्राप्त भएको छ ।
काठमाडौँ, ललितपुर, काभ्रेपलाञ्चोक र भक्तपुरमा क्रमशः नौ, नौ, तीन र तीन जनाको मृत्यु भएको छ । पाँचथर र धनकुटामा दुई-दुई जनाले ज्यान गुमाएका छन् भने झापा र धादिङमा एक-एक जनाको मृत्यु भएको छ।
भक्तपुरको मध्यपुरथिमी नगरपालिका–१ लोकन्थलीस्थित सुष्मा बिपी कोइराला नेत्र प्रतिष्ठानमा पानी जमेपछि उपचार गराइरहेका १८ जना अपाङ्गता भएका बालबालिकालाई उद्धार गरी सुरक्षित स्थानमा सारिएको छ।
