बागमतीको बाढीले डाइभर्सन बगायो, कान्ति लोकपथको यातायात ठप्प
हेटौंडा । निरन्तरको वर्षासँगै आएको बाढीले कान्ति लोकपथ अन्तर्गत हेटौंडा–काठमाण्डौ सडकखण्ड पूर्ण रूपमा ठप्प पारेको छ। बागमती नदीमा पानीको बहाव अत्यधिक बढेपछि मकवानपुर र ललितपुरको सिमानामा रहेको अस्थायी डाइभर्सन बगाएको हो।
डाइभर्सन बगाएसँगै बिहान ६ बजेदेखि नै सवारी आवागमन पूर्ण रूपमा रोकिएको जिल्ला प्रहरी कार्यालय, मकवानपुरले जनाएको छ। प्रहरी नायब उपरीक्षक श्यामु अर्यालका अनुसार सडक खुलाउन प्रयास तीव्र पारिएको छ ,भने यात्रुहरूलाई वैकल्पिक मार्ग अपनाउन आग्रह गरिएको छ।
बागमती खोलाको स्थायी पुल निर्माण नभएसम्म हरेक वर्षको वर्षातमा यो सडकखण्ड अवरुद्ध हुने समस्याले स्थानीयवासी र यात्रुहरूलाई हैरान बनाउँदै आएको छ। यसपटकको अवरोधले विशेष गरी काठमाण्डौ जाने तराईका मालवाहक र यात्रुवाहक सवारीहरू प्रभावित भएका छन्।
पुल निर्माणको प्रक्रिया वर्षौंदेखि अगाडि नबढेकाले अस्थायी संरचनामा निर्भर रहँदा प्रत्येक वर्ष जोखिम मोल्नु परेको यस क्षेत्रका बासिन्दाहरुको गुनासो छ।
